激死人激死人激死人

好耐冇見過呢d 咁厚顏無恥 0既人

好長氣都算啦, 你敲詐人得咁無恥真係好Q乞人憎囉

我理得你係武術教練丫, 真係好想打爆你囉囉囉~~

快使用雙截棍哼哼哈嘻!!

打扁你條貪錢腸粉~~

恭喜自己~

當人地做左成一年工, 已經考慮緊係咪轉工之際,

我終於有第一份工, 係做得超過兩個月架喇~

嘩~~ 好失敗的職場人生~~~

雖然安然渡過兩個月, 但在這麼黑暗的一間公司,

明天被人炒掉或強制辭職也不是甚麼奇怪事

畢竟, 在這間滿佈地雷的公司

被強制辭職, 無啦啦篤背脊, 或者得罪人搞到做左8年都係Junior Writer 的人比比皆是,

以我的資質, 踏中地雷都係遲早的事~~

學汪阿姐前夫話齋,  "its not your kind of game!"

難怪我supervisor 的口頭禪係 "xx, 你記住睇住我呀!"

奇就奇在, 佢對我都係咁講

"大佬, 我做左一個月咋窩!" 我答

"唔好咁講呀! 你賴野我都一齊死架咋~ "  得到好無奈的一個回答

唔知好定唔好彩, supervisor 都係新官上任

雖唔太sociable, 但係100% 實務派

總比以前那些老闆, 由你搞之後由你死

甚至整個陷阱比你去死的好一點

雖然我蠻感激第一任老闆比左個奇幻旅程我

先苦後甜, 那之後的對我來說都是甜品喇

據聞舊公司現在好唔0店, 人才凋零

唯一friend 底的前同事Wing, 繼我之後成為老闆的洩忿對象

最後還是要同老闆weh爛塊面,

做左半年, 都係同我一樣即係執野走

而頂我位的空姐, 成為兩個分別25同40歲designers 的爭女對象

有夠光怪陸離

剛過渡了比較忙碌的一個星期

負責的節目接二連三的搞0店或是on air 了 (雖然都係陸續有來一大堆)

整個情況只能用慘不忍睹不堪入目來形容

就是典型的即刻轉台節目嘛

我們這節目太不堪

雖然張生同王小姐unplug 綵排時真係幾好聽

七一回歸十周年, 順帶一堆所謂回歸show

其實十之有九都係同回歸九唔答八

討厭的羊群心理

上個Entry 的Vivian 問題有後續.

雖然我在公司都係叫自己Vivian (自己講出口都真係頗唔好意思)

但係由於名字和人格太不相襯.

已經有一些奇怪的名字出現

例如V老篤, 或直接 老篤 之類的

人家品牌明明已改名叫V樂敦了嘛

恭喜Wilson 終於離開了TVB.

希望你唔會再被人誤會你係孱弱書生.

最後預祝各位已辭職或將會辭職的朋友轉工順利

最怕改壞名.

對我來說, Vivian 係一個壞名.

對這名字的第一印象, 不是來自自己, 而是玉女掌門人周慧敏小姐.

在stereotype 影響之下,

Vivian = 玉女形象 + 長髮 + 大眼 + 氣質 + 儀態萬千 + 斯文淡定 + 聰明伶俐 + Filter soft-lens 鏡頭 + 說話聲音不超過30分貝

Vivian 絕不等於 短髮 + 細眼 + 冇氣質  + 無儀態 + 粗粗魯魯 + 粗心大意 + 冇腦冇才藝  + 說話超過80分貝加粗口爛舌 (almost 戒掉)

由於我包含以上各項, 所以根本就唔應該叫呢個名, 以至所有超過三個音節的英文名, 例如Gloria, Angela 這一類斯文的名字.

但, 個名跟出世紙, 又唔想晒錢甩掉, 冇法.  

於是, 形成了前兩天尷尬的Vivian VS Vivian 局面.

尷尬的, 不只是我要在跑了五層樓梯後, 滿身臭汗被逼和周小姐這個正印共處一間錄音室工作.

尷尬的, 也不只是那個PR 人員, 介紹 "哈, Vivian, 呢個Writer 都係叫Vivian 窩" 這個我不想宣之於口的秘密.

尷尬的,  是我當著正牌Vivian 的面, 漏了人生史無前例的, 最大啖的兩啖口水.

由嘴角, 筆直地掉落到不知是牛仔褲還是Tee 之上.

我絕不是垂涎周小姐的"美色", (well, 她不是My cup of tea)

只是, 近日吃藥太多太熱氣, 飛滋太癢太痛, 禁不住默默地用舌頭跟飛滋交戰

忘形起來, 儲了滿腔的口水，隨著一個無心的問題，由口中流了出來,

真希望那一下周小姐, 還有玻璃窗外的工作人員和Clients ,

發雞盲看不到我這兩大滴比手指公還要大的口水.

******************************************************

不知道是公司風水問題, 還是將軍澳的空氣問題

搞到由壯健如牛, downgrade 到體弱如鼠的地步.

而且, 因為支氣管炎而咳爆左條血管, 也實在太誇張了吧醫生.

今天, 我學懂了變魔術

看, 彈指間

我將 AC 米蘭的卡卡,  變成了皇家馬德里的碧咸

來賓請掌聲鼓勵鼓勵

下年, 我計劃到拉斯維加斯表演這個魔術

大概會將皇馬的碧咸, 再變成24的男主角Keifer Sutherland

多謝爸媽哥袋cutie小肥anthea橙等一眾親朋好友. Thanks~~

(注意爸媽哥, 與 他媽哥池 無關, 如有雷同, 實屬巧合)

工作前景

若干年後, 如果我們都沒有轉工, 不知會怎麼樣

有人可能成為某某廣告公司的Creative Director, 檯頭放滿advertising awards;

有人可能成為某某公關公司的manager 或director, 檯頭也是放滿 awards;

有人可能成為某Publication 的 Chief Editor, 享受連張凳都幾十萬的豪氣;

有人可能成為公務員或公職人員, 每月定時接收豐厚薪水;

有人可能終於由某公司的managment trainee, 成功晉身managerial  class, 迎接高薪厚職;

亦有人可能毅然放下工作, 背著背包去環繞地球一周, 偶爾在網上發布一張在不知是身處Everest 頂峰上還是阿賽拜疆盆地, 令人羨慕不已的照片

對我來說,

按目前走勢, 我相信我在若干年後最大的成就會是:

成為一本汪明荃百科全書

當人家在吹噓自己年薪幾多百萬, 或一年拿幾多個國際性獎項的時候,

我想我會吹噓一下, 我知汪阿姐著幾號鞋, 用邊隻洗頭水

為了保住這個小小的飯碗, 我嘗試盡量的去敬業樂業

嘗試到有同事覺得我終有一日會愛上汪阿姐

例如我每天也翻看再翻看其十年前的個人傳記相集 荃紀錄

雖然我每一次仔細看完都有點頭痛發燒, 大概是照片太大太多的緣故

尤其是胸部有兩朵太陽花的凍咖啡造型, 更來了一個跨頁 full color spread

而且我亦花了好幾晚去怒煲阿姐的名劇

京華春夢 x 家變 x 紅樓夢 x 書劍 x 倚天 x 不是冤家不聚頭 x 楚留香 x 千王群英會 x 創世紀

每部睇些少都睇到頭昏腦脹

PS 千王群英會真的不錯. 除左有發哥做第二男主角露點演出之外,

睇謝老四搖骰盅, 搖到個骰盅變UFO圍住張賭檯飛一個圈都抵啦.

難怪我尋晚沖涼會無端端唱佢首主題曲.